عمر الرداد

اللي في الصورة ده هو (عمر الرداد) اللي صدر قرار بالعفو عنه من الرئيس الفرنسي، وخرج من السجن، في واحدة من أكبر القضايا المثيرة للجدل في تاريخ فرنسا الحديث، واللي لسه بيتكلموا عنها لحد دلوقتي. القضية اللي تحولت لقضية حقوق إنسان دولية بسبب تفاصيلها الغريبة، واللي لحد النهاردة محدش لاقي ليها تفسير حاسم!
في يوم من أيام سنة ١٩٩١ وتحديدًا في مدينة اسمها (موجان) جنوب فرنسا، بتدخل واحدة ست ومعاها زوجها لقسم شرطة المدينة الصبح، وكانت الأجواء فيه هادية جدًا. الست كان واضح عليها التوتر وإن فيه حاجة غير عادية حصلت، كان اسمها (إريكا) ومعاها زوجها (فرانسيس)، وبدأت تحكي للضابط إن فيه حاجة غريبة حصلت في بيت صديقة عمرها (جيزلين)، ولازم قوة من الشرطة تتحرك وتشوف إيه اللي حصل.
الضابط سألها، حاجة غريبة زي إيه؟ احكي التفاصيل بالضبط علشان نقدر نساعدك.. بدأت إريكا تحكي وتقوله: أنا امبارح كلمت صاحبتي جيزلين الصبح في التليفون واتفقت أنا وهي تيجي تتغدى عندي، وهي قالتلي هتستحمى وتنزلي على طول.
فضلت مستنياها لحد بعد الميعاد اللي اتفقنا عليه بساعتين ومجتش، اتصلت بيها كتير جدًا ومش بترد ودي عمرها ما حصلت، لما لقيتها مش بترد عليا تاني يوم مباشرة اللي هو النهاردة، خدت زوجي ورحت أطمن عليها في البيت.
ولما روحت لقيت حاجة غريبة، جيزلين عربيتها مركونة قدام بيتها، يعني ده معناه إن هي موجودة، لكن لما فضلنا نخبط على الباب محدش كان بيرد أبدًا، والبيت فيه هدوء غريب، أرجوك يا حضرة الضابط أنا قلقانة عليها جدًا، لازم تشوفوا هي فين أو حصلها إيه.
مجرد ما الضابط سمع منها الكلام ده، اتحركت قوة من الشرطة ومعاهم إريكا وزوجها لبيت جيزلين، وفتحت الشرطة باب البيت واللي كان فعلًا ساكن تمامًا، مفيش أي حد موجود،
والغريب إن شنطة جيزلين كانت محطوطة وفيها المجوهرات بتاعتها، لا فيه آثار دخول غير معتاد ولا في أي حاجة تدل إن حصلت سرقة مثلًا أو أي حاجة مش طبيعية.
الحاجة الوحيدة الغريبة إن جيزلين مش موجودة. بدأ المحققين وأفراد الشرطة يدوروا في البيت وفجأة سمعوا زميلهم بينادي عليهم ينزلوا القبو بسرعة، بالفعل اتحرك كل أفراد الشرطة للقبو علشان يشوفوا إيه اللي بيحصل. لما نزلوا زميلهم قالهم أنا فتشت كل الغرف الموجودة في القبو بس دي الغرفة الوحيدة اللي مش عاوزة تفتح، الغرفة مقفولة بإحكام من جوا، حاول أفراد الشرطة يفتحوا الباب بالقوة، بس المفاجأة إنه ماكنش مقفول، ده فيه سرير معدني محطوط وراه.
فضل المحققين يزقوا الباب لحد ما أخيرًا قدروا يفتحوه، وفي اللحظة دي يشوفوا منظر صادم قدامهم، جيزلين على الأرض وقد فارقت الحياة بعد تعرضها لإصابات، وعلى باب الغرفة مكتوب جملة باللغة الفرنسية معناها “عمر كان السبب في اللي حصل لي”، وركز معايا بقى في التفصيلة دي كويس أوي علشان هنحتاجها بعدين (الكلمة كانت مكتوبة لكن كان فيها خطأ نحوي فادح).
الغريب أن الغرفة زي ما قولنا كانت مقفولة من جوا بالسرير، وفي نفس الوقت مفيش أي مكان للخروج منها غير شباك تهوية صغير جدًا، فإزاي الشخص اللي كان موجود قفل الباب عليها من جوا بالسرير وخرج؟ ده كده لغز.
جيزلين مارشال، سيدة فرنسية ثرية جدًا من عائلة كبيرة، عمرها في الوقت ده ٦٥ سنة، أرملة عايشة لوحدها، مثقفة، ست لطيفة ومحبوبة من كل الناس، طبعًا المشهد كان صعبًا. مجرد ما التفاصيل دي انتشرت القضية بقت حديث الرأي العام في فرنسا والمغرب، والشرطة مخدتش وقت كبير علشان تقبض على عمر، طيب مين عمر اللي مجرد ما الشرطة شافت اسمه عرفوا إنه المشتبه به الأساسي؟
عمر الرداد كان شاب مغربي عمره وقتها ٢٩ سنة متزوج وأب لطفلين، عمر كان بيشتغل جنايني بدوام جزئي عند جيزلين بقاله كذا سنة، شاب هادي جدًا ملهوش في أي مشاكل ولا ليه سجل مخالفات سابق.
تاني يوم مباشرة تم العثور عليه في مدينة اسمها (طولون) وهو بيقضي إجازة عيد الأضحى مع زوجته وأسرتها، واتوجهت ليه تهمة التسبب في رحيل السيدة جيزلين! طبعًا لما اتوجهت ليه الاتهامات كان في حالة ذهول، قالهم يا جماعة الست جيزلين دي أصلًا كنت بحبها وبحترمها جدًا، كانت لطيفة معايا ولما بحتاج سلفة مالية مكانتش بتتأخر، إزاي أعمل فيها كده، أنا معملتش حاجة!
لكن طبعًا بالنسبة للشرطة كان قدامها دليل مهم: السيدة كتبت على الباب عبارة معناها إن عمر هو السبب، بس في الوقت ده المجتمع الفرنسي اتقسم لفريقين، فريق بيقول إن عمر هو المسؤول عن اللي حصل، لكن فريق تاني بيقول عمر مظلوم وفيه حد عاوز ينسب ليه الواقعة، وده لسبب واضح جدًا قاله المحامي بتاع عمر.
الجملة اللي كانت مكتوبة على الباب بالفرنسية كان فيها خطأ نحوي مستحيل ست متعلمة ومثقفة زي جيزلين تقع فيه، ده حد مستواه التعليمي متواضع جدًا هو اللي كتبها، ثانيًا عمر ماكانش ليه أي بصمات في مكان الواقعة.
مش بس كده، ده بناء على تقرير الطب الشرعي، فإن الوقت اللي السيدة فارقت فيه الحياة عمر كان في مدينة تانية، وده تم إثباته عن طريق سجلات البنوك من ماكينة ATM سحب منها فلوس، وكمان كان فيه شهود.
المفاجأة بقى أن الادعاء كان مصمم إن السيدة وهي في حالة صحية صعبة ومنهكة طبيعي ترتكب أخطاء وهي بتكتب، والأغرب إن الادعاء عدل التقدير الزمني لرحيلها علشان يتماشى مع الجدول الزمني اللي عمر كان موجود فيه بيشتغل في الحديقة بتاعت البيت!
الادعاء كمان قال إن بالنسبة لموضوع السرير اللي كان محطوط ورا الباب، فسر ده إن الشخص اللي كان موجود لما غادر المكان وظن إن هي فارقت الحياة، كانت لسه على قيد الحياة، واستجمعت قواها وحطت السرير ورا الباب خوفًا من رجوعه تاني، وكتبت الجملة على الباب!
طبعًا محامي عمر قال الكلام ده مستحيل، إزاي واحدة في حالة صحية صعبة هتشيل سرير تقيل زي ده وتحطه ورا الباب؟ ده غير إن مفيش كمان أي دليل مادي أو أداة مرتبطة بالواقعة لقوها، ملابس عمر ماكانش عليها أي آثار من الواقعة، ولا فيه بصمات زي ما قولنا.
في الوقت ده ومن كتر ما القضية كانت كبيرة، قرر المحامي الفرنسي الشهير (جاك فيرجيس) إنه يدافع عن عمر، جاك شن هجوم على منظومة القضاء الفرنسي واتهمها بالتمييز، وإنهم استسهلوا إدانة عامل مغربي فقير لحماية الطبقة البرجوازية الفرنسية، خصوصًا لما تعرف إن فيه أدلة ووثائق اختفت من ملف التحقيق!
ورغم كل اللي إحنا قولناه ده، ورغم غياب أي دليل مادي حاسم، إلا أن المحكمة أصدرت حكمها بناء على شهادة خبراء الخطوط اللي قالوا إن الخط اللي كان مكتوب بيه العبارة على الباب هو خط جيزلين!
وفي ٢ فبراير ١٩٩٤ أصدرت هيئة المحلفين الحكم بإدانة عمر الرداد وحكمت عليه بالسجن لمدة ١٨ سنة، وسط انتقادات كبيرة من منظمات حقوق الإنسان الدولية اللي كانت بتطالب بمراجعة القضية مرة تانية. فضل الضغط مستمر لحد ما وصلنا سنة ١٩٩٦، وبعد وساطات من الملك المغربي الراحل الحسن الثاني، ووسط مطالبات الحقوقيين، صدر قرار بالعفو الجزئي عن عمر.
علشان يخرج عمر من السجن لكنه كان قضى تقريبًا ٧ سنوات، عمر خرج لكن قانونيًا فضل مدان بالتهمة، لأن العفو لا يسقط العقوبة ولا يلغي الإدانة.. ومن اللحظة دي كرس عمر حياته علشان يلغي الإدانة ويثبت براءته، وصلنا سنة ٢٠١٥ وبعد تطور تقنيات الفحص الجنائي وافق القضاء الفرنسي على إعادة فحص الآثار الموجودة على أبواب القبو، وهنا يفجر الخبراء مفاجأة كبيرة!
نتيجة فحص الحمض النووي أثبتت وجود آثار وراثية مختلطة لأربعة أشخاص غير معروفين، ومش مرتبطة بعمر الرداد، عمر ملوش أي أثر وراثي في مكان الواقعة!
وبناء على النتائج دي والأدلة الجديدة اللي ظهرت، قبلت المحكمة سنة ٢٠٢١ طلب عمر في فتح القضية مرة تانية وإعادة النظر فيها بعد ٣٠ سنة من المعاناة، وهو على أمل إنه يقدر يثبت براءته، لكن في شهر أكتوبر ٢٠٢٢ تطلع المفاجأة الجديدة للأسف.
أصدرت المحكمة قرار نهائي برفض إعادة النظر في القضية، والحجة إن وجود آثار وراثية لأشخاص مجهولين ممكن يكون ناتج عن تلوث العينات اللي اتاخدت أثناء التحقيق في التسعينات! علشان تفضل قضية عمر الرداد وجيزلين مارشال واحدة من أكبر القضايا إثارة للجدل والغموض في تاريخ فرنسا الحديث، ولحد يومنا هذا لسه عمر مدان بنفس التهمة.
طبعًا القصة اتعمل منها فيلم شهير جدًا في فرنسا، وكمان وثائقيات استقصائية ضخمة بتحلل الأدلة وكل اللي حصل… هسيبلكم صورة للعبارة اللي كانت مكتوبة على باب القبو، واللي يعرف فرنساوي يقولنا الغلط فين في الكلمة المكتوبة.




