البطل

انا عايزك تسيبك من كل أخبار زوجات وأمهات اللعيبة والتريند الخايب اللي طفح علينا ده، وتيجي تشوف معايا التريند اللي يستحق فعلًا الناس تشوفه ومش واخد حقه

شاب اسمه أحمد مجدي ندا البنا من قرية آبشواي وشغال سباك ومعاه رضيعة عمرها ١١ شهر ، إمبارح وهو نازل رايح شغله اللي في القاهرة ، وفجأة وهو ماشي شاف عربية ملاكي واقعة في الترعة جواها أسرة مكونه من أب وأم وطفلتهم الصغيرة وكانوا خلاص بيغرقوا ، في مشهد فكّر ناس كتير بحادث ترعة المريوطية اللي راح فيها أرواح بريئة ، والناس كانت واقفة تتفرج وخايفة تنزل، لكن أحمد مكنش في دماغه غير حاجة واحدة… إن محدش هيمـ..ـوت النهارده!

أحمد مقالش يلا نفسي أو ممكن أغرق معاهم , وفي ثواني نزل من المواصله وجري وخد طوبة في أيدة ونط فالمياة وركب فوق العربية وفضل يخبط علي إلازاز وهي بتغرق ويقولهم متخافوش مش هسيبكم ، كل ثانية كانت فارقة لأن العربية كانت بتغرق أكتر وبتسحبهم كلهم لتحت..

لحد مالحمدلله قدر يكسر الأزاز ، وبرغم أنه أتعور وأيده أتفتحت من الأزاز ، بس أحمد موقفش وبدأ يطلع اللي جواها واحد واحد ، سحب بنتهم الأول بعدين الأب وفالأخر سحب الأم اللي كانت خلاص بتلفظ أنفاسها الأخيرة ، لحد ما أنقذ الأسرة كلها، الأب والأم وبنتهم الصغيرة ، قبل ما كلنا كنا هنصحي علي خبر .. ( وفاة أسره بالكامل أثر سقوط سيارتهم بأحد الترع بالغربية )

الحمد لله الأسرة دلوقتي بخير ورجعوا لـ بيتهم واحبائهم أمنين ، وبعد فضل ولطف ربنا، يرجع الفضل لشاب قرر يعمل الصح في أصعب لحظة، وخاطر بحياته علشان ينقذ 3 أرواح

أتمنى بقى أحمد يلف على القنوات اللفة اللي لفها حسام ومراته، وإمام ومراته، وزيكو ومراته وأمه ، ويطلع مع عمرو أديب ومنى الشاذلي وريهام سعيد، والناس تحفظ وشه وتزهق منه… لأن ده البطل الحقيقي اللي يستاهل الشهرة، هو ده النموذج الي الناس بتحب تشوفة دايمآ وعمرها ما هتزهق منه ، مش شوية التافهين اللي صدعتونا بيهم ❤️👏🏻